A Asociación para a Investigación de Medios de Comunicación (AIMC) publica o Marco General de los Medios en España 2014, que recolle os datos de audiencia correspondentes ao ano 2013.
O estudo facilita información sobre o nivel de penetración de Internet por Comunidades Autónomas. Un 64,5% dos enquisados utilizaron Internet nos últimos trinta días no conxunto do Estado, o que supón 4 puntos máis que no ano 2012 (60,4%). No ano 2013 incrementou 7 puntos porcentuais o nivel de penetración no último día analizado, acadándose o 53,7% fronte ao 46,7% dos usuarios no ano anterior.
Galicia rexistra un nivel de audiencia de Internet baixo en relación á media estatal nos dous indicadores. O nivel de penetración no último mes analizado acadou o 54,3% dos usuarios e no último día o 45%, o que supón o segundo rexistro máis baixo das audiencias por Comunidades Autónomas no 2013, a pesar de aumentar 3,3 puntos e 5,7 puntos porcentuais respectivamente en relación ao ano anterior.
Fonte: AIMC
