O OSIMGA recolle no informe “A Sociedade da Información nas empresas de Galicia”, correspondente ao ano 2012, os indicadores sobre o uso da sinatura dixital e a seguridade informática.
O emprego da sinatura dixital nas microempresas sitúase por riba do 20% en todas as provincias e, practicamente, por riba do 60% nas de 10 e máis traballadores/as. O seu uso increméntase, en termos xerais, a medida que aumenta o número de empregados/as. En relación ao ano 2010 o incremento situouse no 7,1% nas empresas de 10 e máis traballadores e no 3,1 nas microempresas.
O 90% das microempresas que teñen acceso a Internet dispoñen dun software antivirus ou similar. As devasas (60%) e os mecanismos de autenticación tales como o número PIN ou o contrasinal (51,5%) seguen aos antivirus como elementos de seguridade.
En canto ás empresas de 10 ou máis traballadores/as, o 97,7% das empresas que dispoñen de acceso a Internet dispoñen dun software antivirus ou similar. As devasas e os mecanismos de autenticación séguenlle cun 77,9% e 77,1% respectivamente.
Os arquivos informáticos con datos de carácter persoal rexistrados na Axencia de Protección de Datos son a opción menos nomeada tanto para as microempresas como para as empresas de 10 ou máis traballadores/as cun 36,3% e 67,7%, respectivamente.
Respecto do ano 2010 todos os elementos de seguridade teñen incrementado a súa presenza nas empresas galegas, con especial incidencia, tanto nas microempresas como naquelas que teñen 10 e máis traballadores/as, do servidor seguro. Resulta tamén significativo a adopción de mecanismos de autenticación, elemento de seguridade que se incrementou, entre o ano 2010 e o ano 2012, 6,3 puntos nas microempresas e 4,8 puntos nas empresas de 10 e máis traballadores/as.
Así mesmo, coincidindo co Día Internacional da Seguridade Informática celebrado o pasado día 30 de novembro, cómpre destacar que INTECO publicou unha Guía sobre os riscos e as boas prácticas na autenticación online, que pretende aportar aos usuarios toda a información necesaria para mellorar a seguridade e protexer a súa identidade nos servizos de Internet.
Poden consultarse os datos sobre a seguridade informática nas empresas galegas do ano 2012 na seguinte ligazón
