Os *.es, nomes de dominio de Internet asignados baixo o código de país España, cuxa xestión está encomendada ao Ministerio de Industria, Enerxía e Turismo, a través da entidade pública Rede.es, alcanzaron en Galicia un total de 77.549 rexistros ao peche da primeira metade do exercicio 2014. Isto supón un incremento do 79,52% en cinco anos, xa que os dominios *.es rexistrados nesta comunidade autónoma ascendían entón a 43.199.
Os dominios *.esson os preferidos polos españois, ao representar o 50,43% dos 3,4 millóns que hai rexistrados no noso país. Quince puntos por baixo sitúanse os *.com, co 34,97% e, a continuación, os *.net (4,56%), os *.org (3,10%), os *.eu (3,09%), os *.cat (2,21%), os *.info (1,27%) e os *.biz (0,38%), segundo as estatísticas correspondentes ao mes de xuño de 2014.
Os dominios *.es rexistrados en Galicia supoñen o 5,22% do total dos *.es dados de alta en España, que a final de xuño de 2014 xa sumaban 1.484.773. Desde outros países, hai rexistrados na mesma data outros 245.710 dominios *.es, polo que a cifra global ascende a 1.730.483.
Por provincias da Comunidade Autónoma de Galicia, A Coruña é a que ostenta maior número de dominios *.es activos, cun total de 41.195 (53,12% do total de Galicia). Séguenlle Pontevedra, con 23.548 dominios (30,36% do total); Lugo, con 7.659 (9,88%), e Ourense, con 5.147 (6,64%).
