O “Informe e-commerce” do segundo trimestre de 2012 publicado pola CMT recoñece que o volume de facturación do comercio electrónico acadou os 2.640,8 millóns de euros no conxunto do Estado, o que supón un incremento dun 13,7% en relación ao mesmo período do 2011. Contabilizáronse 36,7 millóns de transaccións mediante tarxeta de crédito, cun crecemento interanual do 17%.
As ramas de actividade cun maior volume de negocio na Internet foron as axencias de viaxe e os operadores turísticos (13,8%), así como o transporte aéreo que acumula a mesma porcentaxe neste trimestre (13,8%); seguidas doutras ramas de actividade como o marketing directo (6,5%), o transporte terrestre de viaxeiros (4,8), os xogos e apostas (3,5%), os espectáculos artísticos, deportivos e recreativos (3,4%), a publicidade (3%) e as prendas de vestir (2,5%).
O crecemento interanual do volume de negocio rexístrase principalmente nas operacións realizadas dende o estranxeiro, cun 17,6%, pero tamén no comercio interior, que aumenta un 13,6% en relación ao segundo trimestre do 2011.
Pode consultarse o informe na seguinte ligazón.
