O estudo “Medición de la Sociedad de la Información” publicado pola Unión Internacional de Telecomunicaciones (UIT) identifica un crecemento internacional constante do sector das TIC e de todos os indicadores clave da Sociedade da Información no período 2010 – 2011, agás na telefonía fixa que reduce sensiblemente o seu nivel de penetración ata o 15,7%.
UIT estima que existen máis de 6.000 millóns de contratos de telefonía móbil no mundo, cun nivel de penetración do 85,7% no 2011. Nos países desenvolvidos o número de contratos xa supera o censo de poboación (122,3%) e naqueles en vías de desenvolvemento sitúase no 77,8%. Considérase que, de manterse este crecemento, o número de liñas de telefonía superarán a poboación mundial no ano 2014, cun nivel de penetración superior ao 100%.
O Índice de Desenvolvemento das TIC (IDT) en España acada un valor de 6,62 puntos no ano 2011 e incrementa en relación ao ano anterior (6,31 puntos) segundo a UIT. España sitúase no posto número 10 do ranking mundial dos principais mercados de telecomunicacións en termos de ingresos por servizos no ano 2010, liderado polos Estados Unidos seguido de Xapón.
A cesta de prezos das TIC (CPT) reduciuse un 30% no período 2008-2011 a nivel internacional. En España este índice de prezos mantívose nos mesmos valores nos anos 2010 e 2011, tanto no custo da banda larga como na telefonía móbil.
Pode consultarse o informe completo na seguinte ligazón
