- O portal do Osimga xa dispón dun cadro de mando con Business intelligence que ofrece a información máis actualizada e completa sobre dixitalización en Galicia
- Esta nova ferramenta permite personalizar as consultas, acceder ao histórico de datos, xerar gráficas e visualizar mapas sobre a dixitalización por provincias
- Facilita unha actualización inmediata das estatísticas da sociedade dixital e aberta a todo o público
O Observatorio da Sociedade da Información de Galicia (Osimga) da Axencia para a Modernización Tecnolóxica de Galicia xa conta cunha nova ferramenta que facilita as consultas sobre as estatísticas de dixitalización que publica periódicamente a través de informes e estudos para a avaliar a penetración das TIC na Comunidade.
Grazas á aplicación de tecnoloxías baseadas en Business Intelligence, os usuarios poderán acceder desde o portal do Osimga, a un cadro de mando que permite personalizar as consultas; seleccionar os anos da serie histórica que se desexen visualizar e presentar un ou varios indicadores simultaneamente na mesma gráfica. Tamén permite modificar diferentes características do aspecto das gráficas.
Grazas á versatilidade da nova ferramenta de difusión, as actualizacións dos datos estatísticos da sociedade dixital iranse aplicando de forma inmediata, cando estean dispoñibles. Ademais, o cadro de mando permite a consulta das series históricas antigas, e que se irán ampliando ano a ano.
Os datos que conten con desagregación a nivel provincial, tamén poden ser visualizados a través de mapas dinámicos integrados no propio cadro de mando.
O novo cadro de mando conta, tamén, cun apartado de resumo dos datos máis destacados e acceso á metodoloxía, fontes de datos e ao proxecto técnico que se aprobou, así como ao plan estatístico anual e á Lei de Estatística de Galicia.
Todas as funcionalidades descritas están xa dispoñibles en OSIMGA.GAL, nun apartado específico na web denominado Cadro de Mando.
