O Informe Económico e Sectorial publicado pola CMT estima que a facturación do sector das telecomunicacións no conxunto do Estado acadou os 37.950 millóns de euros durante o ano 2011, un 4,6% menos que no exercicio anterior. Este dato contrasta co aumento nun 23,5% dos ingresos derivados dos servizos de banda larga móbil, que facturou 2.420 millóns de euros no 2011, cun total de 19,3 millóns de liñas (41,8 liñas por cada 100 habitantes).
O segmento de mercado que experimentou un maior crecemento no 2011 foi o das conexións a través de móbiles intelixentes ou smartphones, que acadou os 15,9 millóns de liñas de datos conectadas activamente a Internet a través do móbil; un 92% máis que no ano 2010.
A banda larga fixa aumentou un 4,8%, ata os 11,16 millóns de liñas. A forte competencia e a recesión económica impulsaron, segundo a CMT, a caída dos prezos de móbil a móbil (16,6%) e de fixo a móbil (12,1%), baténdose récords no caso da portabilidade fixa (1,9 millóns de liñas) e móbil (5,6 millóns de liñas) durante o ano 2011.
Pode consultarse o contido do informe na seguinte ligazón
