O Observatorio da Sociedade da Información e a Modernización de Galicia (OSIMGA) achega unha análise sectorial do nivel de implantación das TIC nas empresas galegas de aloxamento turístico (CNAE 55), que agrupa hoteis, pensións, campamentos de turismo e demais tipoloxías de aloxamento de curta estancia.
No informe “A Sociedade da Información nas empresas de Galicia”, correspondente á edición 2013, facilítanse os indicadores sectoriais de equipamentos e servizos TIC, Internet e Banda Larga, dispoñibilidade de páxina web e redes sociais das empresas galegas de 10 ou máis traballadores/as.
EQUIPAMENTOS E SERVIZOS TIC
As empresas de aloxamento turístico de Galicia, de 10 ou máis traballadores/as, destacan na utilización de servizos “cloud computing” (35,6% das empresas), factura electrónica (40,2% na recepción e 27,2% na emisión) e o modelo de xestión de clientes CRM (51,8%) en relación aos demais sectores de actividade.
Na recepción de facturas electrónicas supérase en 13,6 puntos porcentuais a media do conxunto de sectores.
Gráfica 1: Empresas de 10 ou máis traballadores/as que recibiron facturas electrónicas (%). Fonte: OSIMGA.
Na emisión de facturas electrónicas supérase en 19,4 puntos porcentuais a media do conxunto de sectores.
Gráfica 2: Empresas de 10 ou máis traballadores/as que emitiron facturas electrónicas (%). Fonte: OSIMGA.
INTERNET E BANDA LARGA
A totalidade de empresas galegas de aloxamento turístico dispón de conexión a Internet. Destaca o nivel de conexión a banda larga móbil, que acada o 72,4% en relación ao 64,8% da media de sectores de actividade.
Gráfica 3: Empresas de 10 ou máis traballadores/as que dispoñen de banda larga móbil (%). Fonte: OSIMGA.
PÁXINA WEB E REDES SOCIAIS
Todas as empresas galegas de aloxamento turístico teñen páxina web. O 70,3% está presente nalgunha rede social, 44,7 puntos porcentuais por riba da media do conxunto de sectores de actividade (25,6%).
Gráfica 4: Empresas de 10 ou máis traballadores/as presentes nas redes socias (%). Facebook, LinkedIn, Tuenti, Google+, etc. Fonte: OSIMGA.
Poden consultarse todos os informes na web www.osimga.gal
