Empresas galegas de 10 e máis empregados/as
O 23,6% das empresas galegas de 10 e máis empregados/as realizaron compras a través de Internet no último ano, situándose en valores próximos á media estatal (24,1%). No período 2009 – 2010, a porcentaxe de empresas galegas de 10 e máis empregados/as que realizaron compras a través de Internet medrou un 43,9% fronte ao crecemento do 18,7% que experimentou a media estatal.
O 9,9% das empresas galegas de 10 e máis empregados/as realizaron vendas a través de Internet, fronte ao 13,1% que rexistra o conxunto do Estado.
O 85,8% das vendas por comercio electrónico tiveron como destino as empresas (Business to Business, B2B), un 11,6% tiveron como destino as Administracións Públicas mentres que a porcentaxe de vendas a consumidores finais (Business to Consumer, B2C) foi do 2,7%.
O 79% das vendas a través de comercio electrónico proceden do intercambio electrónico de datos e o 21% a través dun sitio/páxina web.
Microempresas
Un 10,9% das empresas galegas de menos de 10 empregados/as realizaron compras a través do comercio electrónico, o que representa un 3,9% sobre o total de compras efectuadas polas empresas galegas deste segmento empresarial.
As compras a través de Internet nas microempresas galegas experimentaron un crecemento interanual de 4,7 puntos porcentuais, pasando do 6,2% ao 10,9%.
Compras da cidadanía galega través de Internet
Tamén se está a producir un paulatino incremento das compras a través de Internet por parte da cidadanía galega. Un 14,4% da poboación galega mercou algún produto ou servizo nos últimos tres meses, un 5,1% máis que no ano 2009. A media estatal (17,4%) está só 3 puntos por riba da media galega.
Entre as persoas que mercaron en Internet nos últimos 12 meses en Galicia, os produtos e servizos máis demandados son: aloxamento de vacacións (55,2%), outros servizos para viaxes -billetes de transporte público, alugueiro de coches, etc.- (50,7%) e as entradas para espectáculos -cine, teatros, concertos,...- (41,8%). Con porcentaxes entre o 20% e 30%, sitúanse as compras de equipamento electrónico (28,8%), o equipo informático -ordenadores e accesorios- (26,7%), bens para o fogar -mobles, xoguetes, etc.- (26,4%), o material deportivo e roupa (23,9%) e os libros, revistas e xornais (22,4%).
Nota metodolóxica: Os datos relativos ás empresas (de 10 e máis empregados/as e menos de 10 empregados) foron facilitados polo IGE a partir dunha explotación a medida de datos INE. Os datos relativos a compras e vendas a través de comercio electrónico correpóndense á enquisa do INE 2010 que ten como período de referencia para estes indicadores o ano 2009. A fonte de información dos datos relativos á poboación é a “Encuesta sobre Equipamiento y Uso de Tecnologías de la Información y Comunicación en los hogares” – INE 2010.
