Entre os datos presentados este mes no Consello da Xunta de Galicia cabe destacar que durante o ano 2010 houbo máis de 1,2 millóns de accesos de profesionais sanitarios dende Atención Primaria e perto de 940.000 accesos dende Atención Especializada, a través de IANUS, a plataforma de integración de sistemas e rexistro de información clínica desenvolvida polo Sergas.
Segundo indica a Consellería de Sanidade, actualmente o 100% dos profesionais facultativos xa teñen acceso á historia clínica electrónica. Tamén acceden todos os hospitais da rede do Sergas -aos cales hai que sumar dous hospitais concertados- e tamén 443 centros de saúde (o 92% dos centros).
O 2010 rematou con 443 centros de Atención Primaria con receita electrónica, o 92% do total, que teñen adscritos ao 98% da poboación. A porcentaxe de receitas dispensadas electronicamente no último mes (decembro de 2010) foi de arredor do 70%, unha cifra que destaca especialmente se a comparamos con finais do 2009 cando era do 15%.
Máis de 15 servizos para a cidadanía a través da web
Actualmente, en Galicia están dispoñibles para a súa realización a través da Internet un total de 15 servizos públicos sanitarios en liña para o cidadán sobre diversos trámites, relacionados coa tarxeta sanitaria, a solicitude de cita previa, o acceso á historia clínica, a subscrición a noticias e recordatorios de citas, o servizo de suxestións, queixas e reclamacións, e foros de participación cidadá, entre outros.
O 7,4% das citas previas para os centros de saúde son tramitadas a través da páxina web do Servizo Galego de Saúde. Cada día son máis os cidadáns galegos que empregan estes servizos, así, entre outros aspectos a Consellería de Sanidade destaca que o 96,9% dos centros de Atención Primaria (aos cales están adscritos o 99,9% do total de cidadáns) dispoñen do servizo de citación pola internet. Ademais, o 76% dos centros de Primaria poden citar telematicamente para Atención Especializada.
Do informe, despréndese que até 2010 se solicitaron unhas 5.925 tarxetas sanitarias por Internet e se tramitaron uns 2.866 cambios de médico, do Servizo Galego de Saúde, así como outras 587 tarxetas de doadores.
A páxina web do Servizo Galego de Saúde (www.sergas.es) contou durante o 2010 cun total de 6.205.482 accesos, e outros 3.087.140 á intranet.
Tamén destacan os 13.904 accesos a través da páxina web e recibíronse 1.376 peticións de subscrición no servizo de alertas SMS como recordatorio de citas médicas.
Así mesmo, tramitáronse electronicamente un total de 6.945 reclamacións e suxestións dos/as usuarios/as do Sistema Sanitario Galego, e recibíronse 862 documentos de instrucións previas inscritos no Rexistro Galego de Instrucións Previas.
Novas melloras para profesionais e provedores
Entre outros datos, o balance do pasado ano 2010 destaca que o número de solicitudes que se tramitaron a través da Oficina Virtual do Profesional (FIDES) foi de 71.632; e realizáronse 1.366.000 accesos ao sistema; enviáronse 3.597 SMS sobre a xestión de listas temporais de contratación; impartíronse 142 cursos e inscribíronse 40.343 profesionais na formación e-learning; o portal Bibliosaúde (biblioteca virtual para os profesionais) rexistrou 261.256 accesos; e publicáronse un total de 77 alertas farmacéuticas.
Ademais, hai aplicacións específicas para os rexistros de centros e establecementos sanitarios, de enfermos renais, de tumores; un Sistema de Información de Tuberculose; xestión da actividade inspectora de saúde pública; xestión de rastrexabilidade de matadoiros; e un servizo de alarmas nos ordenadores dos centros de saúde e nos PAC.
Os provedores tamén poden realizar diferentes tramitacións a través da páxina web do Servizo Galego de Saúde (www.sergas.es). Así, o 31 de decembro de 2010 había un total de 467 provedores rexistrados na Oficina Virtual do Provedor; a porcentaxe de pedidos de subministracións enviados a provedor por medios electrónicos foi dun 20,7%; enviáronse 352.736 alertas sobre expedientes de contratación; e o 51% das empresas teñen acceso á xestión integral da información do Sistema Acreditador da Formación Continuada das profesións sanitarias de Galicia (SAG).
